Vilt þú hlaupa lengra & hraðar? En umfram allt verkjalaus!

Hlaup eiga að veita okkur vellíðan, frelsi og endorfín – en ekki óþægindi í hnén, stífar mjaðmir eða mjóbaksverk. Hvort sem þú ert að byrja að skokka eða stefna á persónulegt met í sumar, þá er eitt víst, líkaminn þarf að vinna með þér, ekki á móti!

Ef markmiðið er að hlaupa án óþæginda og stuðla að bætingum, þá eru fleiri og mikilvægari þættir í jöfnunni en skóbúnaður og staðfesta í skokkinu. Hér eru nokkur atriði sem vert er að huga að:

•  Liðleiki og mjaðmahreyfanleiki: Takmarkaður liðleiki í mjöðmum orsakar rangt hreyfimynstur sem getur leitt til álagsmeiðsla í kjölfar hlaupa. Þennan liðleika er hægt að bæta t.d. með sófateygjunni (sjá myndband að neðan) og aukinni  meðvitund um mjaðmaliðleika og rassvirkni undir álagi.

• Styrkur í miðju (core – vöðvum) og rassvöðvum: Aukinn miðjustyrkur og virkir rassvöðvar, þegar hlaupið er auka stöðugleika og draga úr álagi á hné og mjóbak. Sjá æfingu í myndbandi sem gagnast til þess að auka styrk og virkni í rassvöðvum á hlaupum.

•  Hlaupatækni: Litlar breytingar á hlaupastíl geta dregið úr álagi á stoðkerfið til muna. Sem dæmi má nefna að forðast að lenda á hæl til þess að minnka högg og álag á liðamót.

• Stigvaxandi álag: Mikilvægt er að byrja rólega, forðast að fara of geyst, of langt eða hratt – líkaminn þarf tíma til að aðlagast.

Lykillinn er að hlusta á líkamann, byggja upp grunninn með viðeigandi tækni, liðleika og styrk.

Njótum hlaupanna í sumar!